Хисеплĕ ентешсем! Депутатсем! Халĕ пур çĕрте те 1941-1945 çулсенчи Аслă Отечественнăй вăрçăра çĕнтернĕренпе 60 çул çитнине паллă тума хатĕрленеççĕ. Пирĕн аттесемпе асаттесем çĕршыв ирĕклĕхне çăлса хăварассишĕн хаяр вăрçă вучĕ витĕр тухнă, хăйсен пурнăçне шеллемесĕр юн тăкнă. Вĕсен нихăçан манми паттăрлăхĕ пирĕншĕн, вăрçă хыççăнхи ăрусемшĕн яланах ырă тĕслĕх пулса тăрĕ. Шел пулин те, вăрçă участникĕсен хисепĕ пирĕн хушăра кунсерен чакса пырать.

Пире мирлĕ пурнăç парнеленĕ вăрçă паттăрĕсем умĕнче эпир ĕмĕр-ĕмĕр парăмра. Тивĕç çук пирĕн вĕсене манма. Сахал мар хура шурне тÿснĕ, пурнăçра пысăк опыт пухнă ветерансем пире кăмăл-сипет, ăс-хакăл тĕлĕшĕнчен вăй-хăват парса тăраççĕ, йывăрлăхсене çĕнтерме пулăшаççĕ. Нумайрах пурăнччăрчĕ вĕсем.

Халĕ, Аслă Çĕнтерÿ уявĕн юбилейĕ умĕн, эпир сире çапла чĕнсе калатпăр. Пирĕнтен нумайăшĕн ашшĕсем вăрçăра çапăçнă. Вĕсене ĕмĕр-ĕмĕр асăнса пурăнма палăксене юсаса çĕнетсех тăмалла, Çар Мухтавĕн музейĕсем, шкулсенчи Çар Мухтавĕн кĕтесĕсем те вĕсем çинчен ытларах пĕлтерччĕр, çитĕнекен ăрăва тивĕçлĕ воспитани пама пулăшчăр. Эпир депутатсене, район çыннисене хамăр районта ирттерекен "Зя себя и за того парня" акцие хутшăнса Çĕнтерÿ фондне ÿстерме пултарнă таран пулăшма чĕнсе калатпăр, пĕтĕм тĕнчипе паллă тăвакан уява йĕркеллĕ хатĕрленсе кĕтсе илер. Вăрçă ветеранĕсемпе тылра ĕçленисене те тивĕçлипе чыслар.