Çу уйăхĕн 16-19-мĕшĕсенче, Чăваш Республикинче тĕнчери 32 çĕршыв представителĕ (Раççей Федерацийĕн ытти регионĕсене шута илмесĕр ) пулчĕ, Кубокшăн пынă ăмăртура пĕтĕмпе 27 çĕршыв спортсменĕ хутшăнчĕ. Харпăр хăй тупăшура 15 çын медальшĕн кĕрешрĕ, 8-шне Раççей хăвăрт утаканĕсем çĕнсе илчĕç, çав шутра виççĕшне - чăвашсем. 20 километрлă дистанцире хĕрарăмсенчен Елена Николаева “ылтăн”, 10 километрлă дистанцире хĕрсенчен Вера Соколова “кĕмĕл”, 20 километрлă дистанцире арçынсенчен Владимир Андреев “бронза” çĕнсе илчĕç. Командăсен хушшинче (пилĕк дистанцие шута илсе) Раççей пĕрлештернĕ команди пĕрремĕш вырăна тухрĕ, иккĕмĕш вырăна - Испани, виççĕмĕшĕнче - Украина команди. Чаплă, çав тери чаплă иртрĕ ăмăрту - питех те çÿллĕ шайра. Шупашкарпа Чăваш Енĕн ытти çитĕнĕвĕсене кура халь пирĕн 2006 çулта хăвăрт утассипе Тĕнче кубокне ирттерме ирĕк çĕнсе илес шанчăк пур.